Pulutan inubos, anak pinatay ng tatay
MANILA, Philippines — Hinataw ng kahoy na dos por dos sa ulo ng isang ama ang kanyang 19-anyos na anak na lalaki matapos na ubusin nito ang kanilang ulam na naganap kamakalawa ng gabi sa harap ng kanilang bahay sa Sitio Masiko, Brgy. Caglayan, Conner, Apayao.
Ang biktima na namatay habang nilalapatan ng lunas sa Conner District Hospital dahil sa internal hemorrhage ay kinilalang si John Paul Molina, Grade VII student sa Cupiz Elementary School.
Ang suspek na kinasuhan ng parricide ay kinilalang si Roberto Molina Sr., 41.
Batay sa ulat, bago nangyari ang krimen dakong alas-6:30 ng gabi sa harap ng bahay ng mag-ama ay kasalukuyang nag-iinuman ang suspek at kabarkada nitong si Joseph Bayaua.
Nang kukunin ng suspek ang ulam para ito ay kanilang gawing pulutan ay ubos na ito kaya’t galit na galit nitong tinawag ang anak at paglapit ay agad na hinambalos ng dos por dos na kahoy sa ulo sa matinding galit.
Bumagsak ang biktima na sumakit ang ulo at nagsuka bunsod upang isugod ito sa pagamutan.Gayunman dahilan sa internal bleeding sa ulo ay binawian ito ng buhay dakong alas-1:00 ng madaling araw.
Agad na nasakote naman ng mga pulis ang ama na sising-sisi sa pagpatay sa anak.
- Latest