46 Chinese wanted sa cybercrime ipinadeport

MANILA, Philippines — Ipinadeport ng Bureau of Immigration (BI) ang apatnapu’t anim na mga puganteng Chinese na wanted sa cybercrime.

Ayon kay BI Commissioner Jaime Morente, ang mga dayuhan ay naaresto ng BI-Fugitive Search Unit noong nakalipas na buwan sa operasyon na kanilang ikinasa sa Lungsod ng Makati. ?

Kabilang sila sa 81 dayuhan na nadakip ng BI noong November 7 sa Burgundy Towers sa Gil Puyat Avenue kung saan sila ay iligal umanong nag-ooperate ng online trading business.

Sinabi ni Morente na naipadeport ang mga dayuhan noong December 1, 2017 sakay ng China Southern Airlines na may biyaheng patungong Shenyang, China.

Dagdag pa ni Morente, nailagay na rin ang pangalan ng nasabing mga pugante sa immigration blacklist.

Kinumpirma naman ni Atty. Arvin Cesar Santos, hepe ng BI Legal Division, na noon pang November 17 nakapagpalabas ang BI board of commissioners ng summary deportation order laban sa mga ito.