5 ahensya ng pamahalaan sanib pwersa sa tigil-pasada

MANILA, Philippines — Limang ahensya ng pamahalaan ang magsasanib pwersa kabilang ang Metropolitan Manila Development Authority (MMDA) upang hindi tuluyang maparalisa ang transportasyon kaugnay sa nakatakdang dalawang araw na tigil pasada na ilulunsad ng transport group simula bukas Disyembre  4 at  5.

Nabatid kay Jojo Garcia, MMDA assistant general ma­nager for planning, magsasanib pwersa sila ng Land Transportation Franchising and Regulatory Board (LTFRB), Land Transportation Office (LTO), Philippine National Police, Highway Patrol Group (PNP-HPG) at Department of Transportation (DOTr) para ayudahan ang mga mananakay na maaapektuhan sa isasagawang strike ng transport na pangungunahan ng PISTON.

“Magtutulungan ang lahat ng ahensya ng government para at least hindi maramdaman ang effects ng strike,” ani  Garcia.

Sinabi ni Garcia, magde-deploy ng apat na bus ang MMDA upang magbigay ng libreng sakay sa mga commuters na apektado ng jeepney strike.

Bukod sa MMDA, LTO, PNP, HPG, LTFRB at DOTR, magtatalaga rin ng mga masasakyan ang lokal government units (LGUs).

Nabatid na bukas Disyembre 4 at 5 ay magasasagawa ng tigil pasada ang PISTON upang mariing tutulan ng mga ito ang ipatutupad na jeepney moder­nization program  ng gobyerno sa Enero, 2018.

Kung saan nakatakdang i-phase-out na ng pamahalaan ang mga jeep na nasa 15 taon na ang edad.

Nilinaw ni Tim Orbos, undersecretary for road ng DOTr, layunin aniya ng jeepney modernization, na mabigyan ng may kalidad na serbisyong pang transportasyon ang mamamayan.

“We need to finally give respect to our commuters and provide public transport that dignifies the riding public by giving them safe, convenient, and efficient public transport,” text message ito Orbos.