Lolo utas sa suntok ng kapitbahay
CAVITE, Philippines — Patay ang isang 61- anyos na lolo matapos na mapuruhan ng suntok ng lasing na kapitbahay nang magtangkang umawat ang matanda sa pakikipagtalo ng kanyang apo sa suspek kamakalawa ng hapon sa Trece Martirez City Cavite.
Kinilala ng pulisya ang biktima na si Redentor Ramos, 61 anyos, residente ng Purok 10, Brgy. San Agustin Trece Martires City, Cavite.
Nakatakas naman ang suspek na si Marcus Pangilinan, 41 anyos, ng Purok 10, Brgy. San Agustin, Trece Martires City matapos ang insidente.
Sa ulat ng pulisya, alas-5:00 ng hapon nang magtungo sa bahay ng biktima ang suspek na lasing. Ang apo ng biktima ang pinuntahan ng suspek at pinagsalitaan niya ng mga masasamang salita at pinagmumura na nagbunsod ng pagtatalo. Dito na lumapit at umawat ang lolong biktima subalit agad siyang binigwasan at suntukin sa mukha ng dalawang beses ng suspek.
Agad na itinakbo sa ospital ang nakabulagtang matanda subalit namatay din makalipas ang may ilang oras na gamutan habang mabilis na tumakas ang suspek.
- Latest