Mayoryang Pinoy pabor sa pagdurog sa Maute
MANILA, Philippines — Lumabas sa isinagawang survey ng Social Weather Station (SWS) na mayorya ng Pilipino ang nagpahayag ng suporta sa ginawa ng gobyernong Duterte na pagdurog sa Maute-ISIS group na lumusob sa Marawi City sa nakalipas na limang buwan.
Sa isinagawang survey ng SWS mula September 23-27 sa may 1,500 respondents ay 66 percent ang kuntento sa ginawang aksyon ng Duterte government at Armed Forces of the Philippines (AFP) upang durugin ang Maute-ISIS group habang nasa 18% naman ang hindi pumabor at 16 percent ang undecided.
Dahil dito, ay mayroong net satisfaction rating na good +48 ang naging aksyon ng gobyerno laban sa Maute group.
Ang naging tanong sa SWS survey ay: “Gaano po kayo nasisiyahan o hindi nasisiyahan sa ikinikilos ng ating gobyerno ukol sa kanilang ginagawa upang masugpo ang grupong Maute na lumusob sa Marawi City?”
Mayorya din ng mga Pilipino ang kuntento sa naging performance ni Pangulong Duterte at kanyang administrasyon sa paglaban sa terorismo particular sa Maute group.
Nakakuha ng very good net satisfaction rating si Pangulong Duterte na +67 sa naging aksyon ng gobyerno laban sa terorismo.
Nakapagtala din ng very good net satisfaction rating ang gobyerno sa paglaban nito sa terorismo hanggang sa magapi ang Maute group.
Magugunita na noong Oktubre 23 ay idineklara ni Pangulong Duterte na liberated na ang Marawi City mula sa terorismo matapos ang 4 na buwang pakikipaglaban ng gobyerno sa Maute group.
Samantala, ikinatuwa naman ng Malacañang ang positibong resulta ng SWS survey kaugnay sa naging aksyon ng gobyerno laban sa Maute group.
- Latest
