8 Abu sumurender

MANILA, Philippines — Walong miyembro ng bandidong Abu Sayyaf Group (ASG) ang sumuko sa military sa Jolo, Sulu.

Sinabi ni Brigadier General Cirilito Sobejana, commander ng Joint Task Force Sulu, na ang walo ay pawang mga kasapi ng napatay na si ASG sub-leader Alhabsy Misaya.

Kinilala ang mga sumuko na sina Rakib Usman Mujakkil, 35; Sadhikal Sabi Asnon, 38; Jarrain Elil, 52; Wahab Buklaw, 47; Anggan Ali Sahaw, 43; Bandi Ahadjula, 56; Adih Manis Juhaini, 25; at Alden Banon, 30-anyos.

Ayon pa kay Sobejana, ang nasabing mga bandido ay sumuko sa 2nd Special Forces Battalion sa kanilang headquarters sa Sitio Bayug,  Barangay Samak sa bayan ng Talipao dakong alas 7:35 noong Sabado.

Isinuko ng mga bandido ang walong matataas na kalibre ng armas kabilang na dito ang dalawang M16 rifles, isang M14 at limang M1 Garand rifles.

Pinasalamatan naman ni Sobejana ang Local Government Units (LGUs) at iba pang stakeholders at mga Tausugs na nasa likod ng kanilang kampanya para tapusin ang terorismo sa Sulu.