Marawi troops doble ang sahod
MANILA, Philippines — Nakatakdang doblehin ng pamahalaan ang sahod ng mga police at military personnel lalo na ang mga tropa na nakipaglaban sa mga Maute-ISIS sa Marawi City.
Ito ang tiniyak ni House Appropriations Committee chairman at Davao Rep. Karlo Nograles bilang suporta sa pahayag ni Pangulong Duterte na doblehin ang sahod ng mga pulis at sundalo.
Anya, nararapat lamang na bigyan ng mataas na sahod ang mga unipormadong babae at lalaki na nakipaglaban sa Marawi City na nanganib ang kanilang buhay sa pakikipaglaban sa mga teroristang grupo.
Inindorso na rin umano ng Department of Budget and Management (DBM) sa Senado at Kamara ang isang draft resolution na opisyal na nagbibigay ng 100 porsiyento salary increase para sa police at military personnel.
Idinagdag pa ng kongresista na ito ang tamang procedure ng Kongreso lalo na ng Kamara na mayroong power of the purse o kapangyarihan para maglaan ng pondo para magastos ng gobyerno.
Tiniyak ni Nograles, na aaprubahan ang draft resolution sa sandaling mag-resume ang sesyon ng Kongreso sa Nobyembre 13.
- Latest