Jeepney modernization ipapatupad muna sa Metro Manila
MANILA, Philippines — Nilinaw ni Land Transportation and Franchising Regulatory Board (LTFRB) chairman Martin Delgra na sa Metro Manila muna ipapatupad ang PUV Modernization Program kabilang dito ang Taguig, Pateros at ang ruta ng shuttle patungo ng Senado.
Gagamitin dito sa Metro Manila ang tinatawag na category 2 at 3 ng modernong jeep na akma para sa lubak-lubak na mga lansangan sa mga lalawigan.
Nilinaw naman ni Delgra na hindi lamang limitado sa iilang car manufacturer ang pagsu-supply ng mga makabagong jeep dahil maaari naman umanong pumasok dito ang kahit aling kumpanya ng sasakyan basta may kakayahan na tumugon sa requirement ng modern jeepney.
Samantala, nakiusap naman ang iba’t ibang transport group tulad nina George San Mateo ng PISTON, Efren de Luna ng ACTO, Zeny Maranan ng FEJODAP, Boy Vargas ng ALTODAP at Joseph Abeleda ng L-TOP sa LTFRB na itigil muna ang implementasyon ng PUV modernization dahil maraming bagay silang hindi naiintindihan.
Mabigat din umano ang plano na pagsama-samahin sa fleet ang mga pampasaherong jeep dahil kawawa dito ang indibidwal na operator.
Marami din anyang nakakatakot na aspeto ang programa dahil may balita na susuwelduhan na lamang dito ng P500 kada araw ang mga tsuper at pamimiliin pa sila kung ano ang gagamiting fuel, kung solar, euro o kuryente.
- Latest
