88% pinoys aprub sa drug war-survey
MANILA, Philippines — Todo suporta ang mayorya ng Pinoy sa drug war ng gobyerno sa kabila ng pag-iingay ng mga kritiko.
Ito ang lumabas sa latest survey ng Pulse Asia na isinagawa mula September 24-30 at lumitaw na 88 percent ng mga Pilipino ay patuloy ang pagsuporta sa drug war ng Duterte government samantalang 2 percent lamang ang ayaw.
Sa nasabing survey sa 3rd quarter ay naniniwala din ang 73 percent ng respondents na nangyari ang extra judicial killing (EJK) habang ipinapatupad ang drug war habang 20 percent naman ng mga Pinoy ang hindi naniniwala na may naganap na EJK sa nasabing operasyon.
Karamihan ng mga Pinoy ay naniniwala na nangyari ang EJK sa Metro Manila (78 %) at 75 percent naman sa Luzon habang 68 percent at 67 percent naman sa Visayas at Mindanao.
Ayon naman kay Presidential Communications Sec. Martin Andanar, patunay lamang ito na dapat tapusin ni Pangulong Rodrigo Duterte ang kampanya laban sa illegal drugs.
Magugunita na nakakuha ng 82 percent na approval at trust ratings si Pangulong Rodrigo Duterte sa pinakahuling survey ng Pulse Asia taliwas sa resulta ng Social Weather Station (SWS) kung saan ay bumagsak sa 48 percent ang trust at satisfaction ratings nito.
Kamakailan ay iniutos ni Pangulong Duterte sa Philippine Drug Enforcement Agency (PDEA) na pangunahan ang drug war matapos alisin na ito sa Philippine National Police (PNP) at iba pang law enforcement agencies.
Pero inamin mismo ng Pangulong Duterte na duda siyang maipapanalo ng PDEA ang anti-drug war ng gobyerno at naniniwala na ang human rights ang mananalo sa laban dahil hindi kasali ang PNP at AFP na inaakusahan sa extra-judicial killings.
- Latest
