300 pulis mula Malabon, Navotas at Valenzuela inilipat sa Caloocan

MANILA, Philippines — Nasa 300 pulis mula sa Malabon, Navotas, at Valenzuela ang inilipat sa Caloocan City upang punan ang kakulangan sa puwersa dulot ng malawakang sibakan.

Pinangunahan ni Northern Police District (NPD) Director, Chief Supt. Amando Clifton Empiso ang send-off sa 300 pulis at inatasan na gampanan ng buong katapatan ang tungkulin.

Anya, ang paglilipat ng kanilang mga tauhan ay isang polisiya ng pambansang pulisya na maging mga matataas na opisyal ay maaaring malipat ng assignment anumang araw.

Sa pagdating ng mga bagong talagang pulis, ipinaliwanag sa kanila na maitatalaga sila sa isa sa pitong Police Community Precincts kabilang ang PCP 2, 4 at 7 na sangkot sa mga kontrobersya.

Inaasahang higit sa 1,000 pulis ang tatanggalin sa Caloocan Police kung saan inuna na ang mga tauhan ng PCP 2, 4 at 7.

Hinihintay pa rin ang dagdag pang pulis buhat sa Regional Public Safety Battalion (RPSB) at ang mga miyembro ng Davao City Police.