Bato- ‘kulturang kuyog’ vs ‘virus cops’ pairalin
MANILA, Philippines — Nais ni Philippine National Police chief Director General Ronald Dela Rosa na pairalin ang kultura ng kuyog upang mabawasan ang naglipanang “virus” o mga tiwaling pulis sa kanilang hanay.
“We are trying to develop a culture, yung kuyog culture. Kung sino yung gumagawa ng masama kuyugin ng matitino at mababait na pulis para hindi magkalat yung virus,” wika ni Dela Rosa.
Ginawa ni Dela Rosa ang pahayag matapos na pangunahan ang promosyon ng mahigit sa 1,300 na pulis sa Camp Crame, kahapon ng umaga.
Anya, panahon na para makialam ang mga matitinong pulis at kuyugin ang mga tiwaling pulis na sumisira sa imahe ng PNP.
Idinagdag pa nito na maituturing virus ang mga tiwaling pulis na dapat nang wakasan sa tulong ng kulturang kuyog.
Pinaalalahanan rin ng PNP Chief ang mga bagong promote na opisyal ng PNP na maging sensitibo at huwag pamarisan ang masamang ginagawa ng kanilang mga kasamahang pulis.
Sinabi ni Dela Rosa na mas nakakatakot kung walang pakialam ang mga opisyal ng PNP sa masamang ginagawa ng mga kapwa nila pulis dahilan mas masisira at hindi mapipigilan ang pagkasira ng organisasyon.
Ang ginawang pahayag ni Dela Rosa ay sa gitna na rin ng serye ng kontrobersya na kinasangkutan ng mga pulis sa Caloocan City kabilang ang pagkakapatay sa ilang tinedyer sa giyera kontra droga at warrantless raid sa isang bahay na pinagnakawan pa ng mga ito habang kasama ang isang menor de edad at pilay na asset noong Agosto at unang bahagi ng buwang kasalukuyan.
- Latest
