Gwapotel isinara na
MANILA, Philippines - Nagkaroon muna ng tensyon sa pamamagitan ng nasa 600 tenants at manggagawa ng Gwapotel na matatagpuan sa Bonifacio Drive, Port Area, Maynila sa mga tauhan ng Metro Manila Development Authority bago tuluyan itong napasara kahapon ng umaga.
Ayon kay MMDA General Manager Thomas ‘Tim’ Orbos, luma at ‘condemned building’ na ang Gwapotel kaya kailangan ipasara para ipaayos at muling magamit.
Ginawa ang pagpapasara sa kabila ng mariing pagtutol ng mahigit sa 600 manggagawa na nawalan ng murang tulugan sa halagang 50 pesos sa loob ng 12 oras.
Ayon naman sa mga tenant, ang Gwapotel ay hindi totoong ‘condemned na, sa halip patuloy na ginagamit ng ilang Overseas Filipino Workers (OFW) na naglalakad ng kanilang mga papeles sa Metro Manila.
Ito rin ang pahingahan ng mga naglalako ng paninda sa kalye, taxi driver, construction workers at iba pa.
Ang Gwapotel, na mas kilala sa tawag na Hotel Gwapo, ay pangunahing proyekto ni dating Pangulong Gloria Macapagal Arroyo at dating MMDA Chairman Bayani Fernando.
- Latest