Alvarez kay Faeldon: Mag-resign ka na!
MANILA, Philippines - Resign and spare President Duterte from further embarrassment!
Ito ang mariing tinuran kahapon ni House Speaker Pantaleon Alvarez laban kay Bureau of Customs (BOC) Commissioner Nicanor Faeldon kaugnay ng imbestigasyon ng House Committee on Dangerous Drugs sa smuggling ng P 6.4 bilyong droga sa kagawaran nito.
Ang smuggling ng 604 kilo ng droga na nagkakahalaga ng P 6.4 bilyon ay kapwa iniimbestigahan ng dalawang Kapulungan ng Kongreso.
Bunga ng pagkakabulgar ng kontrobersya sa smuggling ng bilyong halaga ng droga sanhi ng umano’y pagtanggap ng tara o suhol ng mga tiwaling opisyal ng BOC ay umani ng pagbatikos ang nasabing tanggapan.
Magugunita na sa pagdinig ng House Ways and Means Committee noong Agosto 7 ay tinukoy ng Customs broker na si Mark Taguba ang mga pangalan ng umano’y mga opisyal ng kagawaran na umano’y tumanggap ng tara para mailusot ang shipment ng mga kargamentos na naglalaman ng droga sa ‘green lane’.
Kabilang sa mga pinangalanan ni Taguba ay sina Customs Intelligence Chief Director Neil Anthony Estrella; Milo Maestrecampo, Director ng BOC Import and Assessment Service; Deputy Commissioner Teddy Raval; District Collector Vincent Philip Maronilla, isang alyas Teddy Sagaran at iba pa na pulos alyas ang mga ginamit na pangalan.
Bunga ng insidente ay nagbitiw naman sa puwesto sina Estrella at Maestrecampo na nagsabing lilinisin nila ang kanilang mga pangalan.
Sinabi naman ni Surigao del Norte Rep. Robert Ace Barbers, Chairman ng House Committee on Dangerous Drugs na irerekomenda ng kaniyang panel kay Pangulong Duterte na huwag ng mag-atubiling sibakin sa puwesto si Faeldon.
- Latest
