Pulis patay sa ambush
MANILA, Philippines - Namatay noon din ang isang pulis nang pagbabarilin ng hindi pa nakilalang mga suspek sa naganap na ambush kamakalawa sa Tanauan City, Batangas.
Ang nasawi ay kinilalang si PO3 Eric Lindo, 46 dating nakadestino sa Sto.Tomas Municipal Police Station (MPS) at ngayo’y nagre-report sa Holding Center sa Camp Crame, Quezon City.
Batay sa ulat, bago nangyari ang insidente dakong alas-2:00 ng hapon sa kahabaan ng Purok 6, Brgy. Pagaspas ay kasalukuyang minamaneho ng biktima ang kaniyang kulay itim na Mitsubishi Lancer (PLR-758) patungong Brgy. Sala kasama ang helper nitong si Cristoto Manimtim.
Pagdating sa tulay na nag-uugnay sa Tanauan City at Sto. Tomas ay pinagbabaril ito ng nag-aabang na mga suspek.
Nagawang makadapa si Manimtim habang pilit namang pinaharurot ng parak sa kabila ng sugatan ang kaniyang sasakyan, subalit hinabol pa rin ito ng mga suspek at muling pinagbabaril.
Kinuha ng mga suspek ang kulay itim na sling bag at service firearm saka mabilis na nagsitakas lulan ng kulay asul na Honda Civic na nakaparada sa kabilang kalsada malapit sa crime scene.
Narekober sa crime scene ang 29 basyo hindi pa natukoy na armas, relo nito at P 1,050.00 cash at dalawang plastic sachet ng shabu.
- Latest