Pacquiao at Goitia, magtutulungan para sa Pasig River Transport
MANILA, Philippines - Tiniyak nina Senador Manny Pacquiao at Pasig River Rehabilitation Commission (PRRC) Executive Director Jose Antonio “Ka Pep” Goitia ang pagtutulungan upang matupad ang Pasig River-Laguna de Bai Multi-Modal Express Transport na tiyak lulutas sa malalang trapiko sa Metro Manila at Southern Tagalog.
Binaybay kamakailan nina Pacquiao at Goitia ang Pasig River kung saan nakita ng senador ang potensiyal na mapakinabangan ang makasaysayang ilog lalo na sa transportasyon at eco-tourism.
“Great experience (ang Pasig River tour)! At least nakita ang problema sa Ilog Pasig. At higit pa sa inaakala natin, kailangan nating linisin. Kailangan nating magtulungan... magkaroon ng proyekto, programa, para malinis ang Ilog Pasig para gawin nating eco park or tourism park,” diin ni Pacquiao. “We’ll make Ilog Pasig an eco-tourism park to use for transportation and reduce our traffic in (Metro) Manila.”
Inatasan kamakailan ni Pangulong Rodrigo Duterte si Pacquiao bilang tagapangulo ng Senate committee on public works na maging oversight point person para sa implementasyon ng Pasig River Comprehensive Development project na malugod na tinanggap nina Goitia at Laguna Lake Development Authority (LLDA) General Manager Jaime Medina na katuwang sa proyekto.
Dahil dito, binansagan ni Goitia si Pacquiao bilang “Kampeon ng Pasig River” sa gagampanan nitong mahalagang papel para sa katuparan ng proyektong bubuhay sa makasaysayang ruta mula sa Pasig River hanggang Laguna de Bai at balikan sa pamamagitan ng light rail transit at ferry boat service.
- Latest
