10 banyaga inaresto sa black sand mining
MANILA, Philippines - Inaresto ng mga ahente ng National Bureau of Investigation (NBI) ang 9 na Chinese nationals at 1 Indonesian national nang maaktuhan sa iligal na pagmimina ng minerals o black sand ng walang kaukulang permit mula sa gobyerno sa dead river ng San Felipe, Zambales, nitong Mayo 20, 2015.
Ang mga nadakip at isinalang na sa inquest proceedings sa Iba, Zambales Provincial Prosecutor’s Office ay kinilalang sina Zhining Tang, Liao Nantu, Yichang Lin, Zhibin Xu, Jinwei Chen, Hongming Zhou, Wen Haihu, Yong Wang, Tang Peilong, pawang Chinese national; at Afrizon Hary, Indonesian.
Sa ulat ng NBI-Environmental Crime Division (NBI-EnCD), nakatanggap sila ng impormasyon hinggil sa iligal na pagmimina ng lahar sand na pinaniniwalaang black sand sa Macolcol River, San Felipe, Zambales, gamit ang foreign dredging vessels na inupahan umano ng kumpanyang nakabase sa Pilipinas na walang kaukulang permit mula sa Department of Environment and Natural Resources-Mines and Geosciences Bureau (DENR-MGB), Department of Labor and Employment (DOLE), at Maritime Industry Authority (MARINA).
Idineploy ni NBI Director Dante A. Gierran para sa surveillance at naaktuhan ang isinasagawang dredging ng buhangin na hinahakot patungo sa nakaantabay na cargo vessel.
- Latest