Pork barrel scam muling bubuksan-Gordon

MANILA, Philippines - Kapag may bagong ebidensiya sa pork barrel scam ay nakahanda si Sen. Richard Gordon na muling buksan ng senate blue ribbon committee ang imbestigasyon dito.

“Well, kung may ebidensya na bago na papasok, I will investigate. Pero ‘di naman ako papasok basta-basta kasi nasasayang rin ang oras, wala pa tayong nakikitang ebidensya,” wika pa ni Sen. Gordon, chairman ng blue ribbon committee

‘‘Pag meron na tayong nakita na talagang pwedeng imbes­tigahan ... ipagpapatuloy natin ‘yan,” dagdag pa ni Gordon.

Lumutang ang posibilidad na muling buksan ang PDAF investigation matapos maabswelto ng Court of Appeals ang sinasabing mastermind ng pork barrel scam na si Janet Lim-Napoles sa serious illegal detention case nito.

Tinitignan ng Department of Justice kung puwedeng maging state witness si Napoles sa mga bagong pork barrel cases sa gagawing re-investigation ng DOJ.

Nagpahayag naman ng kahandaan ang kampo ni Napoles na maging state witness sa pork barrel cases.

Inilipat sa Camp Bagong Diwa detention center si Napoles matapos iabswelto ito ng CA sa serious illegal detention case.

Sinabi ni Sen. Gordon, sakaling matuloy ang re-investigation ng Senado ay maaaring imbestigahan din ang mga personalidad na tinukoy sa COA special audit report na hindi pa nasampahan ng kaso.

Bukod kay Napoles, nakakulong pa din sa pork barrel fund scam case sina Sen. Jinggoy Estrada, Sen. Bong Revilla habang pinayagang magpiyansa naman si Sen. Juan Ponce Enrile.