5 Koreano inaresto sa illegal online gambling
MANILA, Philippines - Inaresto ng mga tauhan ng National Bureau of Investigation (NBI) ang limang Korean national na iligal ang operasyon ng online sports betting sa pagsalakay sa isang subdivision sa Pasig City.
Sinabi ni NBI director Dante Gierran, nahaharap sa reklamong paglabag sa Republic Act 10175 o Cybercrime Prevention Act of 2012 ang mga nadakip na sina Cheonji Kim, Ilhwan Yang, Wonsup Yang, Jeong Hyeok Kim at Moon Kyu Kang.
Sa pamamagitan umano ng modus na magtago ng kanilang aktibidad sa mga exclusive division para hindi mabisto ng otoridad at ang kinikita ay pasok naman sa money laundering kung saan nalulugi ng milyones ang kaban ng gobyerno.
Nabatid na nakipagtulungan sa NBI ang Eastern Police District para mapasok ang target area.
Samantala, 12 rin na Korean nationals ang binitbit naman ng mga tauhan ng Bureau of Immigration (BI) na pawang sangkot umano sa online business scam o panloloko.
Sinabi ni Immigration Commissioner Jaime Morente, mismong ang South Korea Embassy ang humingi ng tulong sa kanila para sa ikadarakip ng 12 suspek na may tinakasang kasong large scale fraud sa kanilang bansa.
Nitong Miyerkules, Mayo 17, nang madakip ng BI-Intelligence operatives sa isang condominium building sa Makati City ang di pinangalanang mga suspek.
Nabatid na mga kababayang Koreano ang binibiktima ng grupo sa panghihimok na mag-invest sa mga bogus na real estate project sa Pilipinas.
Isinalang na sa deportation proceedings ang mga dayuhan dahil sa pagiging undesirable alien at pagiging banta sa seguridad ng publiko.
- Latest