Nangawat og saging gipusil, gipanigbas

CEBU, Philippines - Tulo ka tawo nga giingong nangawat og saging gipusil ug gipangtigbas sa wa pa mailhing tawo didto sa Purok Dike, Barangay Jaclupan, Talisay kaniadtong Martes sa gabii.

Ang mga nasamdan mao sila si Dionesio Gilluano, 26; Jhuncris Castañares, 23 ug si Jundil Castañares, 24, pulos ulitawo ug parehong nagpuyo sa Barangay Jaclupan.

Matud sa kapolisan nga ang tulo giingong nanguha og saging nga walay pagtugot sa tag-iya. Gituohan nga ang ilang makuhang saging ilang ibaligya sa merkado sa Tabunok.

Samtang sila nagtaga sa punoan sa saging, nakadungog sila og buto sa armas hinungdan nga sila mikaratil pagdagan. Apan tungod sa kangiob naglisud sila sa pagkakita sa mipusil kanila nga nagbitbit og flashlight.

Si Gilluano nakabatyag og sakit sa iyang tiyan ug diha pa siya makabantay nga naigo siya sa pagpusil ug nagpahatod siya sa Talisay City District Hospital.

Pipila ka oras ang nakalabay, ang laing duha niya ka kauban, niabot na usab sa ospital nga adunay mga samad tinigbasan sa ilang kalawasan.

Matud sa mga samaron nga tungod sa kangitngit wala na sila masayod kinsa ang nagpusil ug nagtigbas kanila.

May report nga kining tulo ka samaron aduna nay record nga mga hilabtanon sa mga butang nga dili ila. Gisusi pa sa kapolisan kinsa ang nagpusil ug nagtigbas sa tulo ka giingong kawatan. (BANAT NEWS)