Polis sikop sa balay sa pusher
CEBU, Philippines - Polis nga nadestino sa Mambaling Police Station naapil pagkasikop uban sa duha ka suspetsadong drug pusher atol sa gipahigayong buy-bust operation didto sa Sitio Pailob, Barangay Sambag 2, dakbayan sa Sugbo kaniadtong Martes sa gabii.
Si PO1 Gem Duran Querubin, 33, taga Lorega-San Miguel giapil pagdakop kay nasakpan siya nga didto sulod sa balay sa drug pusher nga si Sharon Abella, 32, uban sa ikatulong suspek nga si Chas Chavit, 23. Si Abella maoy subject sa operation.
Matud ni Senior Inspector Narrolf Tan, hepe sa Cebu City Anti-Illegal Drugs Special Operations Task Group (CAIDSOTG) nga nakuhaan nila og usa ka putos nga shabu si PO1 Querubin, ingon man si Chavit.
Napalitan usab og shabu sa poseur-buyer sa kapolisan si Abella apan dihang nakamatngon nga gi-buy-bust siya sa mga polis abtik kining midagan sulod sa balay ug gigukod siya sa mga polis.
Didto na nga nasakpan sa mga polis si PO1 Querubin ug si Chavit. Nailhan dayon ni Tan si PO1 Querubin kay kaniadto nadestino siya sa Mambaling Police Station.
Apan giangkon ni Tan nga sa pag-background check nila ni Abella nga usa ka “high value target” wala mogawas ang ngalan ni PO1 Querubin.
Si PO1 Querubin nagpakilooy pa gani unta nga dili siya apilon sa pagdakop, apan giapil gyud siya kay nasakmitan man siya og drugas. Ang shabu nga nakuha gikan kanilang tulo miabot og 50 gramos ug gibana-bana nga mokantidad og P593 mil.
Sa interview, si PO1 Querubin nangatarungan nga miadto ra siya sa balay ni Abella kay manghuwam unta siya’g kuwarta aron ipatambal sa iyang amahan.
Si Abella nanghimakak sab nga namaligya siya’g drugas kay matud niya ang shabu nga nakuha gikan kadto ni Chavit nga igo lang misulod sa iyang balay.
Matud ni Chavit nga usa ka babaye ang nagsugo kaniya nga dalhon ang drugas sa balay ni Abella ug bayran siya’g P100, apan nadakpan hinoon siya sa mga polis.
Matud ni Abella nga molarga unta siya sa gawas sa nasud karong sunod buwan apan dili na kini matuman kay bilanggoon na siya tungod sa iyang pagkasikop. (BANAT NEWS)
- Latest
