De Lima paiimbestigahan sa Bilibid riot
MANILA, Philippines – Nakatakdang paimbestigahan ng oposisyon sa Kamara sa National Bureau of Investigation (NBI) at Philippine National Police (PNP) kung mayroong kinalaman si Senador Leila de Lima sa nangyaring riot sa loob ng National Bilibid Prison (NBP) kung saan napatay ang isang convicted drug lord at pagkasugat ng tatlong iba pa kabilang ang kontrobersiyal na inmates na si Jaybee Sebastian.
Ayon kay Kabayan partylist Rep. Harry Roque, kailangang imbestigahan ng mga otoridad ang posibleng pagkakasangkot ni De Lima sa nangyaring riot at dahil sa nangyaring insidente ay hindi na makakadalo pa sa pagdinig ng Kamara sa Oktubre 5 si Sebastian.
Iginiit naman ni House Justice Commitee chairman Reynaldo Umali kung hindi makakadalo si Sebastian sa Oktubre 5 dahil sa pangyayari ay dapat itong dumalo sa Oktubre 6 at 7.
Bukod kay Sebastian kasama sa mga papadalhan ng subpoena ay sina Ronnie Dayan, dating driver-body guard ni De Lima at dating security aide niya na si Joenel Sanchez, dating Bucor Chief Franklyn Bucayu at dating PAOCTF chief Reginald Villasanta.
Bukod dito ang mga tetestigo rin umano sa mga high profile inmate sa Bilibid ang nagkumpirma na tumatanggap si De Lima ng malaking halaga buhat sa drug money kay Sebastian.
Naniniwala naman si Roque na hindi kayang kontrolin ng gobyerno ang NBP kaya nagkakaroon ng ganitong kaguluhan bunsod na rin sa sobrang dami ng nakapiit dito kaya nagkaroon ng riot sa loob ng Bilibid.
- Latest