Itinumba sa pier... Digong: Sinong gustong sumunod sa drug lord couple?
MANILA, Philippines - Mistulang binalaan ni Pangulong Rodrigo Duterte ang mga drug syndicates tungkol sa sinapit ng mag-asawang Odicta na umano ay mga drug lord matapos itumba kahapon ng madaling araw sa pier ng Caticlan, Aklan.
“Sino gustong sumunod dito kay Odicta, bakante ngayon. Patay na raw,” pahayag ni Duterte nang mabalitaan nya nang dumalaw sa burol ng isang pulis na napatay sa anti-drug operation.
Batay sa ulat, dakong ala-1:30 ng madaling araw ay naglalakad ang mag-asawang sina Melvin Odicta, na tinaguriang Dragon drug lord ng Iloilo at misis nitong si Merriam sa walkway ng port terminal galing sa roll-on-roll –off vessel nang pagbabarilin ng mga salarin.
Nagawa pang maisugod ang mag-asawa sa Malay Hospital, subalit idineklara silang dead-on-arrival.
Sinabi ni Pangulong Duterte na si Melvin alias “Dragon,” ay sangkot sa illegal drugs hindi lang sa Iloilo kundi sa maraming parte ng Visayas.
Pinabulaanan na ito nina Melvin at misis na si Merriam noong Huwebes nang sila ay sumuko kay Interior Secretary Mike Sueno sa Camp Crame na nangako pang ibubulgar ang ‘drug matrix’ tungkol sa mga pulitiko at opisyal ng PNP na sangkot sa droga.
Ang mga ito ay kinunan ng ‘judicial confession’ sa PNP-Criminal Investigation Group (PNP-CIDG) at matapos ito ay pinauwi rin.
Hindi naman kumbinsido si PNP Chief P/Director General Ronald dela Rosa sa pagtanggi ng mag-asawa sa drug list ng PDEA.
“Siya ay wanted at number 1 drug lord. Talagang drug lord ito at ibinalita sa akin na binaril at napatay ang mag-asawang Odicta. I cannot say anything good or bad. ‘Yan ang pinili niya eh,” wika ni Duterte.
“’Yang Odicta was really being hunted. Inabot siya ng malas,” dagdag pa ni Duterte.
Una nang ibinunyag ng Philippine Drug Enforcement Agency (PDEA) na si Odicta ay major supplier ng drugs sa lalawigan ng Iloilo at kilala ito bilang “Dragon”.
Ayon sa pulisya, posibleng natatakot umano ang mga drug lords at mga protektor ng mag-asawa na ibulgar sila sa drug matrix kaya pinatahimik ang mga ito.
Patuloy ang imbestigasyon ng pulisya sa pagpatay sa mag-asawang Odicta.
- Latest
