Magkapatid na paslit patay sa sunog
MANILA, Philippines – Halos hindi na nakilala ang bangkay ng dalawang magkapatid na paslit matapos na makulong sa nasusunog nilang bahay kahapon ng madaling araw sa Las Piñas City.
Ang mga nasawi ay kinilalang sina Eunice, 2-anyos at ang sanggol nitong kapatid na si Princess Nicole Benigal, 1-anyos.
Batay sa ulat, dakong alas-12:34 ng magsimula ang sunog sa isang bahay sa Everlasting Homes, Brgy. Talon, 4 ng lungsod matapos maiwan ang nakasinding kandila.
Mabilis na kumalat ang apoy at nadamay ang bahay ng mga biktima na nagkataong wala ang kanilang mga magulang na sina Roselyn Binegla at Richard Palmones.
Umabot sa ikatlong alarma ang sunog at dakong alas-2:55 ng madaling araw nang ideklarang fire under control na kung saan ay humigit kumulang na nasa 40 kabahayan ang natupok.
Sa isinagawang mopping operation ay doon nakita ang bangkay ng magkapatid.
- Latest