11 na sabit sa illegal drugs, napatay
MANILA, Philippines - Nasa 11 katao na sangkot sa illegal drugs ang naiulat na nasawi sa iba’t ibang lugar sa Metro Manila at ibang lalawigan.
Namatay noon din ang biktimang si Ruben Andrade, na sangkot sa pagbebenta ng droga, residente ng San Vicente, Brgy. 178, Camarin, Caloocan City nang pasukin ng isang lalaki ang bahay nito at pagbabarilin siya kamakalawa ng alas-2:30 ng hapon habang nanonood ng telebisyon.
Binaril at napatay din ang 38-anyos na si Genesis Labiana, jobless, residente ng Apex Compound, Brgy. 20, Zone 2, Parola Compound, Tondo, Maynila ng hindi pa kilalang suspek dakong alas-11:00 ng umaga.
Nakuha sa kaliwang kamay ng biktima ang 4 na sachet ng shabu na nakabalot pa sa isang pirasong P20. bill.
Isang hindi pa kilalang motorcycle rider ang nasawi nang ito ay makipagbarilan sa mga pulis nang ito ay hindi huminto sa isang checkpoint kahapon ng ala-1:50 ng madaling araw sa Caloocan City.
Inalarawan ang nasawing suspek na nasa 5’4” ang taas, nasa 20-25 anyos, at nakasuot ng itim na jacket at bonnet.
Nakuha sa posesyon ng suspek ang isang calibre .38 na may limang bala at isang napaputok na bala at isang maliit na bag na may lamang dalawang plastic sachet ng hinihinalang shabu.
Pinatay din ang sinasabing drug pusher na kinilala lamang sa alyas Machete kahapon ng alas-3:00 ng hapon ng dalawang hindi pa nakikilalang lalaki sa Visitation St., Barangay San Juaquin, Pasig City.
Nakuha sa bulsa ni Machete ang limang plastic sachet na naglalaman ng droga at mga drug paraphernalias.
Sa Naga City, Camarines Sur binaril at napatay din ng nagpapakilalang Bicol Vigilante ang isa umanong drug pusher na si Ariel Bucacao kamakalawa ng alas-5:30 ng umaga sa Almeda Avenue, Saint James, Brgy. Concepcion Grande ng nasabing lungsod.
Nakuha sa pinangyarihan ng krimen ang isang hand grenade, 1 sling bag na naglalaman ng 3 pirasong 100 peso bill at isang carton paper na may nakasulat na “WAG TULARAN ANG MGA PUSHERS, BICOL VIGILANTE”.
Tatlong lalaki rin ang binaril at napatay sa bayan ng Paracale, Camarines Norte noong araw ng Sabado at Linggo.
Kinilala ang biktimang sina Emmanuel De Lemios, 36, ng Sta. Rosa St., Brgy. Poblacion; Rodel “Bornok” Jalimao, 30, at residente ng Purok 2, Barangay Pinagbirayang Munti at Jaydee “Rod” Juguilon, 24, at residente ng Purok 2, Barangay Parang, Jose Panganiban.
Tatlo naman na pinaghihinalaang drug pushers na sina Jujit Villa, 41; Jeric Ginanao, 32; at Fungo Pasuguiron, pawang residente sa bayan ng Moises Padilla sa lalawigan ng Negros Occidental at pinagbabaril ng mga hindi pa kilalang mga kalalakihan na hinihinalang mga vigilante sa bayan ng Vallehermoso, Negros Oriental kamakalawa. -Danilo Garcia, Ludy Bermudo, Joy Cantos, Mer Layson, Francis Elevado-
- Latest