Ginang ipinahuli ang lover sa kanilang sex video
MANILA, Philippines – Nagsampa ng reklamo ang isang ginang laban sa kanyang live in partner dahil sa pananakit at pagkukulong sa kanya, pagkuha ng video ng kanilang pagtatalik at pagbabanta na papatayin at ipapagahasa sa mga ka-tropa nito sa Marikina City kamakalawa ng gabi.
Ang naarestong suspek ay kinilalang si Mart Angelo Rosales, nasa hustong gulang, at residente ng Room B, Carmelita Compound, Magsaysay St., Barangay Parang, Marikina City.
Ang pagdakip kay Rosales ay dahil sa reklamo ng biktima na itinago sa pangalang Grace, residente rin ng naturang lugar.
Ayon sa biktima, ang pinakahuling insidente nang pambubugbog sa kanya ay naganap dakong alas-9:00 ng gabi kamakalawa sa loob ng kanilang tahanan.
Dumating ng bahay ang suspek at bigla na lang sinipa at sinuntok ang biktima dahil umano sa selos at pinagbantaan na ipapagahasa sa kanyang mga kaibigan.
Sa loob aniya ng dalawang linggong relasyon ay hindi siya nito pinapayagang lumabas ng kanilang bahay at tuwing magtatalik sila ay ibinibidyo ito ng suspek nang labag sa kanyang kalooban.
Dahil sa mga ginagawa ng suspek kaya’t nagpasya ang ginang na ipaaresto na ito.
- Latest
