Sundalo patay, 5 sugatan sa ambush

MANILA, Philippines – Nasawi ang isang sundalo habang lima pa ang nasugatan  kabilang ang isang tinyente nang tambangan sila ng mga pinaghihinalaang miyembro ng mga rebeldeng New People’s Army (NPA) kamakalawa sa kahabaan ng national highway, Catarman, Northern Samar.

Kinilala ang nasawing sundalo na si Corporal Raymundo Corales, aktibong miyembro ng Army’s 63rd Infantry Battalion (IB) na nakabase sa bayan ng Lope de Vega ng lalawigan.

Nilalapatan ng lunas ang limang sundalo na sina 1st Lt. Mark Vincent Ching; Sergeant Marlon Constantino; Private First Class Eric Lazarra; Private First Class Chris Jonathan Bisnar; at Private First Class Pablito Pomarca.

Naitala ang pananambang dakong alas-3:30 ng hapon sa kahabaan ng national highway ng Sitio Hibabaogan, Brgy. Washington, Catarman.

Sa ulat ay kasalukuyang pabalik na ang tropa ng mga sundalo sa himpilan ng Army’s 63rd IB sa bayan ng Lope de Vega lulan ng KIA military truck nang paulanan ng bala ng NPA rebels pagsapit sa national highway ng Brgy. Washington, Catarman.

Sa kabila ng sugatan ay pinilit ni Pomarca na imaneho ang military truck na flat pa ang gulong hanggang sa makarating ang mga ito sa Brgy. Polangi, may 5 kilometro ang layo sa ambush site at dito na ang mga ito sinaklolohan ng mga sibilyan na maihatid sa pagamutan.