Misis, lover kalaboso sa ‘adultery’

MANILA, Philippines - Naghihimas ngayon ng rehas ang isang misis at ang lover nito nang mahuli sa akto na magkasiping sa loob ng bahay ng kaibigan ng una sa Nabua, Camarines Sur, kamakalawa.

Ang mga suspek ay nakilalang sina Luz Ganal-Pacardo, nasa hustong gulang, residente  ng San Antonio, Poblacion, Nabua  at kalaguyo nitong si Elorden Buban, 26.

Batay sa imbestigasyon ng pulisya, dakong alas-12:30 ng madaling-araw ng mahuli  ng mister na si Danny Pacardo, 34, sa aktong magkasiping ang magkalaguyo sa bahay ni Marcela Acabado Laorsa sa Zone 6, Barangay La Opinion ng nasabing bayan.

Ayon kay Pacardo, nakita niya ang kanyang misis na katabi ang suspek at dito niya napatunayan na totoo ang tsismis na kumakalat sa kanilang barangay hinggil sa bawal na relasyon ng dalawa.

Hindi aniya alam ng nasabing misis na  matagal  na itong sinusubaybayan ng kanyang mister hanggang sa mahuli sa akto ang pagtataksil nito.

Mabilis na tumawag ng opisyal ng barangay at pulisya ang napendehong mister at naaresto ang magkalaguyo bandang alas-3 ng madaling araw.

Kasong adultery ang nakatakdang  isampa sa magkalaguyo na nakadetine sa Nabua Police Station.