Trak nakanal: 3 pahinante patay

MANILA, Philippines – Namatay noon din ang tatlong pahinante matapos ang kanilang sinasakyang hauler truck ay nahulog sa kanal kamakalawa sa kalye ng Brgy. Villa San Isidro, Purok 3, Camarines Norte.

Ang mga nasawi ay kinilalang sina Gerry Mercado, 20; Ruel Requillas, 30 at kapatid na si Marvin,17.

Batay sa ulat, dakong alas-8:00 ng gabi ay binabagtas ng isang hauler truck (VFC-252) na minamaneho ni Rolando Boy Torres, 49 na may kargang mga niyog na pag-aari ng isang Sofronio Panaligan.

Pagsapit sa nasabing lugar ay biglang nawalan ng kontrol ang sasakyan at tuloy tuloy na nahulog sa isang kanal na kung saan ay hindi nakalabas sa sasakyan ang tatlong biktima na naging dahilan para sila ay maipit at mamatay noon din.

Samantala, sa bayan ng Baao, Camarines Sur ay namatay ang isang trike driver na si Luis Bitmal, 57, ng Brgy. Buluang makaraang ang minamanehong tricycle ay bumangga sa isang asul na kotseng Nissan (PRP-939) na minamaneho ng isang Ricky Viñas, 30, ng Brgy Binanuaanan, Pili, Camarines Sur at nakatakdang sampahan ng kaukulang kaso.