Mga pulis magbubusal ng baril ngayon
MANILA, Philippines – Inilagay na sa full alert status ngayong umaga ang nasa 18,000 miyembro ng National Capital Region Police Office (NCRPO) upang palakasin ang seguridad sa paghahanda sa pagsalubong sa Pasko at Bagong Taon.
Ayon kay NCRPO chief Director Carmelo Valmoria na kanya nang inatasan ang limang district directors at 38 station commanders na busalan ng tape ang lahat ng kanilang mga baril ngayong araw.
Ang pagbusal ng tape sa dulo ng mga baril ng pulis ay upang maiwasan ang mga ito na masangkot sa indiscriminate firing sa pagsalubong sa Pasko at Bagong Taon.
Nabatid na ang NCRPO ay isa sa ahensiya na inatasan ng Department of Health na gawin ang programang “Mahalaga ang Buhay, Iwasan ang Paputok” upang sa ganun ay mabawasan ang bilang ng mga nasusugatan at nasasawi sa pagsalubong ng nasabing dalawang okasyon.
Binalaan din si Philippine National Police (PNP) officer-in-charge (OIC) Deputy Director General Leonardo Espina na sisibakin sa serbisyo ang mga pulis na masasangkot sa pagpapaputok ng kanilang mga baril.
- Latest