Purisima: ‘I rate myself about a 9’
MANILA, Philippines – Ni-rate ni PNP Director General Alan Purisima ang sarili at halos perpekto ang ibinigay niyang grado bilang pinuno ng Philippine National Police (PNP).
Sa pagtatanong ni Senador Grace Poe kung ano ang self rating ni Purisima sa efforts sa PNP 1 to 10, 10 bilang pinakamataas, “I rate myself about a 9,” ang naging tugon ng PNP chief.
Ito’y sa kabila ng mga kontrobersyang kinakaharap niya tulad ng kuwestyunable umanong statement of assets, liabilities and net worth (SALN) at “White House” sa Kampo Crame.
Matapos ibigay ang self rating, harapan namang inamin ni Poe na may inconsistencies siyang nakita sa naging testimonya ni Purisima sa Senado.
Paghimay ng senador, dapat noong una pa lang ay nilinaw na ni Purisima na bagama’t wala siyang ipinapatayong property sa Nueva Ecija ay may nakatayo na siyang bahay doon.
Sa kabila rin ng paliwanag ng PNP chief, iginiit ni Poe na hindi tama ang naging paraan ng pagtanggap nito ng donasyon para sa multi-milyong official residence sa Crame.
At para kay Poe, 4/10 lang si Purisima.
“Dito sa hearing kung ako ba’y kumbinsido na wala nang, pwedeng sabihin nating anomalya, siguro baka 4. Ang sinasabi ko lang dito sa hearing na narinig ko,” sabi ng senador sa press conference matapos ang pagdinig.
Una nang nanindigan si Purisima na hindi siya magbibitiw sa puwesto.
- Latest