Ginang na buntis, anak dedo sa tipak ng bato
MANILA, Philippines - Halos madurog ang katawan ng isang ginang na nasa kabuwanan ng pagbubuntis at anak nitong dalagita matapos na magulungan ng malalaking tipak ng bato ang kanilang bahay sa naganap na landslide kamakailan sa Maharlika highway, Brgy. Canipa, Calbayog City, Samar.
Sa naantalang ulat ng National Disaster Risk Reduction and Management Council (NDRRMC) kinilala ang mag-inang nasawi ay sina Marife Monteves, 37, na 9 buwang buntis at ang anak nitong si Danica,12.
Masuwerte namang nakaligtas ang mister nito na si Danilo at dalawa pa nilang anak na sina Diana, 9 at Danilyn, 5, na nagtamo ng mga sugat sa katawan.
Sa ulat, bandang alas-2:00 ng hapon nitong Sabado nang mabagsakan ng malalaking tipak na bato na mula sa itaas ng bundok ang bahay ng pamilya Monteves.
Ayon kay Danilo sa mga otoridad, mahimbing silang natutulog nang makarinig sila ng rumaragasang malakas na dagundong ng mga bato at tumama sa kanilang bahay na nasa paanan ng bundok at nasapol ang mag-ina.
Nagawa namang makapagkubli ni Danilo at dalawa pa nitong mga anak kaya nakaligtas sa trahedya.
Pinaniniwalaan namang ang paglambot ng lupa ang sanhi ng pagragasa ng mga bato.
- Latest