Guiao, Ross nakaligtas sa suspensyon

MANILA, Philippines — Nabigo ang PBA Commissioner’s Office na makitaan ng ebidensya si NLEX head coach Yeng Guiao na nagsabi ng racist remark laban kay point guard Chris Ross ng nagdedepensang San Miguel sa kanilang laro sa 2018 PBA Philippine Cup noong Biyernes sa Cuneta Astrodome sa Pasay City.

Ito ay taliwas sa alegasyon ni Ross na sinabihan siya ni Guiao na ‘nigger’ sa kanilang mainitang komprontasyon sa huling 1:46 minuto ng fourth quarter.

“Upon review of the incident, consulting possible witnesses to the event and discussing the matter with both parties, the alleged racist remark attributed to Coach Guiao could not be established,” wika kahapon ni PBA Officer-In-Charge Willie Marcial sa kanyang statement.

“Coach Guiao has denied such allegation while Chris Ross has opted to move forward and said that he would not want to discuss the matter further. However, Coach Guiao and Chris Ross will be subject to appropriate fines for their respective misconduct,” dagdag pa nito.

Dahil dito ay pinagmulta ng PBA Office si Guiao ng P11,000, samantalang P2,600.00 para kay Ross.

Ang multa ni Guiao ay para sa ginawa nitong “obscene gesture, use of profane language and engaging in a verbal altercation” kay Ross.

Ang dalawang technical fouls naman ni Ross ay may katumbas na multang P2,600.00.

Sa kanilang murahan ay kapwa tinawagan sina Guiao at Ross ng technical fouls na nagresulta sa pagkakatalsik sa laro ng Fil-Am point guard.

Mariing iginiit ni Marcial na walang lugar sa liga ang mga racist remarks.

“Let me reiterate that racism has no place in the PBA. It is totally unacceptable in our society and in sports in general. The PBA will not hesitate to act if the evidence so warrants.The PBA, its players and its officials are called upon to uphold the highest standard of respect that our youth can look upon as an example,” sabi ni Marcial.

“Rest assured that any act that is racially derogatory and pejorative in nature will be dealt with sternly by the league,” paniniyak pa ng PBA OIC.

Samantala, inaasahan ding papatawan ng multa at suspensyon sina Rain or Shine center Raymond Almazan at Kia power forward Eric Camson sa kanilang laro noong Sabado sa nasabi ring Pasay City venue.

Sa isang rebound play sa huling 3:01 minuto ng second period ay siniko ni Camson sa panga si Almazan na gumanti din ng siko sa huli kasunod ang kanilang rambulan.