Splash bros. umatake uli
Pinilit maka-iskor ni Klay Thompson ng Golden State laban kina Kris Dunn (#32) at Justin Holiday ng Chicago.
CHICAGO – Kapag kumokonekta ang ‘Splash Brothers’ ay kuntento na si Kevin Durant sa kanyang supporting role.
Kumamada si Klay Thompson ng 38 points habang nagdagdag si Stephen Curry ng 30 markers para pamunuan ang Golden State Warriors sa 119-112 panalo kontra sa Bulls.
Ang nasabing tagum-pay ang franchise record-tying na ika-14 sunod na road win ng Golden State.
“It was an old-school Splash Brother game,” sabi ni Warriors head coach Steve Kerr kina Thompson at Curry.
Naglista si Thompson ng 7-for-13 shooting sa three-point range samantalang may 6-of-11 clip naman si Curry.
“When they got it going like that, you just play your role and know your place, man,” wika ni Durant, nagdagdag ng 19 points, 8 rebounds at 7 assists.
Tumabla ang Golden State sa third-longest road winning streak sa isang season sa NBA history.
Ang LA Lakers ang may hawak ng record na 16 dikit na road wins noong 1971-72 season.
Umiskor naman si Nikola Mirotic ng 24 points para sa Chicago, nakakuha kina center Robin Lopez at Kris Dunn ng tig-16 markers.
“We played three quarters of really good basketball, but you take one off against a team like this, you’re not going to win,” sabi ni Bulls coach Fred Hoiberg.
Naglaro ang Warriors na wala sina Draymond Green at Andre Iguodala na parehong may injury habang si Jordan Bell ay nagkaroon ng sprained left ankle nang tangkaing pigilin ang dunk ni Lopez.
- Latest
