Alab babangga sa Mono Vampire
MANILA, Philippines — Matapos makalasap ang ikaapat na pagkatalo, hangad ng Tanduay-Alab Pilipinas na makabangon sa pagsagupa sa Thailand Mono Vampire sa 2017-2018 ASEAN Basketball League sa Stadium 29 sa Bangkok, Thailand.
Nakatikim ng ikalawang kabiguan ang Alab Pilipinas kontra sa Singapore Slingers noong Miyerkules kaya kailangang manalo kontra sa Mono Vampire sa una nilang pagtatagpo ngayong alas-7 ng gabi.
Bumaba ang tropa ni coach Jimmy Alapag sa ikaanim na puwesto sa bitbit na 3-4 kartada sa likuran ng Chong Son Kung Fu ng China (4-0), Hong Kong Eastern Lions (7-1), Thailand Mono Vampire (5-3), Singapore Slingers (4-5) at Saigon Heat (3-2).
Alam ng Thailand team ang kalibre ng Alab Pilipinas kaya pinaghandaan din nila ito sa pamamagitan ng pagkuha ng mas versatile na import na si Michael Singletary, pumalit kay Patrick Sanders.
Ang 6’5 na Singletary ay dating import sa PBA at pangtapat ng Mono Vampire kay Alab import Justin Brownlee.
Nagmula ang Mono Vampire sa 115-111 panalo laban sa Malaysia Westports Dragons noong Huwebes.
- Latest