Khan vs Pacquiao tuloy na?

MANILA, Philippines — Kamakailan ay inihayag ni Bob Arum ng Top Rank Promotions ang muling pag-akyat sa boxing ring ni Filipino world eight-division champion Manny Pacquiao sa Abril.

Sinabi ng veteran promoter na maghahanap siya ng isang bigating sasagupa kay Pacquiao.

Balak ni Arum na isagupa ang 39-anyos na Senador sa isang matinding karibal sa Abril bago isagupa sa mananalo kina Australian world welterweight king Jeff Horn at Terence Crawford sa Nobyembre.

At posibleng si British star Amir Khan ang humarap sa Filipino boxing superstar, ayon kay promoter Eddie Hearn ng Matchroom Boxing.

Isang three-fight contract ang nilagdaan ng 30-anyos na si Khan sa Matchroom Boxing ni Hearn sa hangaring maibalik ang dating world light welterweight titlist sa boxing scene.

“The plan is to box in April and then again in August or September in preparation for a super-fight in winter 2018,” sabi ni Hearn kay Khan.

“The target is to provide him with the biggest fights possible with a mouth-watering list of names including the likes of Manny Pacquiao, Kell Brook, Keith Thurman and Errol Spence.”

Matatandaang nabasura ang dapat sana ay bakbakan nina Pacquiao at Khan noong nakaraang taon kung saan isang investment group mula sa United Arab Emirates ang nangako ng malaking pondo.

Ngunit walang nai-pakitang pera ang nasabing grupo kaya pinili ni ‘Pacman’ na sagupain si Horn na umagaw naman sa kanya ng WBO welterweight crown via unanimous decision noong Hulyo 2 sa Brisbane, Australia.

Huling nakita sa aksyon si Khan noong Mayo ng 2016 kung saan  napabagsak siya ni Canelo Alvarez sa sixth-round sa Las Vegas, Nevada.