“PVL on Tour” hahataw sa Laguna
MANILA, Philippines — Dadayo ang Premier Volleyball League sa Sta. Rosa, Laguna para sa tatlong laro na pinamumunuan ng banggaan ng three-time champion Pocari Sweat at Philippine Air Force ngayon sa Sta. Rosa Sports Complex.
Magtutuos ang Lady Warriors, inangkin ang tatlo sa apat na PVL conferences na kanilang nilahukan, at ang Lady Jet Spikers sa ganap na alas-4 ng hapon.
Maghaharap naman sa alas-6 ng gabi ang Banko-Perlas, kinabibilangan ng mga dating players ng Ateneo at University of the Philippines, at ang Far Eastern University, naghahanda para sa darating na UAAP volleyball season sa Enero.
Sa alas-2 ng hapon ay magtatapat naman ang NCAA powerhouse na San Sebastian, pangungunahan ni one-time PVL and three-time NCAA Most Valuable Player Grethcel Soltones, at ang Akari Adamson.
Bigla namang umatras ang UAAP title-holder na Ateneo sa kanilang pagsagupa sa Banko-Perlas.
Sinimulan ng “PVL on Tour” ang paglapit sa kanilang mga fans sa pamamagitan ng pagdaraos ng mga provinces kagaya sa Batangas, Cagayan Valley, Iloilo, Bacolod at ngayon ay sa Laguna.
- Latest
