Bubugbugin lang ni Pacquiao si Connor--Roach

MANILA, Philippines — Hindi isang tunay na professional boxer si UFC superstar Conor McGregor at inaaasahang bubugbugin lamang ni Manny Pacquiao ang UFC superstar sakaling matuloy ang kanilang boxing fight sa susunod na taon.

“He’s not that great a boxer, in my mind. And I think we all saw that,” wika ni Freddie Roach, ang chief trainer ni Pacquiao, sa panayam ng Fight Hub TV.

Noong Agosto ay ginawa ni McGregor ang kanyang boxing debut at pinasuko ni Floyd Mayweather, Jr. sa tenth-round ng kanilang 12-round, non-title fight.

Nagbulsa ang 41-an-yos na si Mayweather ng higit sa $300 milyon, samantalang tumanggap ang 29-anyos na si McGregor ng $100 milyon.

Sa isang social media post ay ipinarating ni Pacquiao kay McGregor ang kanyang interes para sa isang boxing bout sa 2018.

Sinabi ni Roach na sa ibabaw lamang ng boxing ring dapat gawin ang laban nina Pacquiao at McGregor at hindi sa loob ng Octagon sa UFC.

“Well Manny always told he doesn’t like that sport because it’s more like a street fight,” sabi ni Roach.

“But it’s a very winnable fight and there’s a lot of money in that fight.  It’s kind of like ripping off the world, it wouldn’t be a fair fight. Unless Manny fought by their rules too, that would be a fair fight,” dagdag pa nito.

Inamin ni Pacquiao na may kinatawan siyang kumakausap sa kampo ni McGregor.

“May mga bali-balita lang, pero siyempre may representative si McGregor na nakikipag-usap sa representative ko,” ani Pacquiao. “But I don’t know yet sa conversation nila kasi sabi nila he is willing to fight. Pero hindi pa natin alam dahil mahirap magbigay ng conclusion kung ano ang mangyayari. Hintayin na lang natin.”

Nauna nang sinabi ni UFC president Dana White na idedemanda niya si Pacquiao at ang sinumang makikipagnegosasyon kay McGregor para sa isang boxing fight.

Kasalukuyang may exclusive contract si McGregor sa UFC.

Gustong itapat ni White si McGregor kay UFC interim lightweight king Tony Ferguson.

“Tony is the interim champion, Conor is the champion, it’s the fight that makes sense. It’s the fight that has to happen,” sabi ni White.