Dallas diniskaril ang debut ni Leonard

DALLAS – Humugot si point guard J.J. Barea ng 14 sa kanyang 16 points sa second half at diniskaril ng Mavericks ang season debut ni San Antonio Spurs star Kawhi Leonard matapos kunin ang 95-89 panalo.

Hindi nakalaro si Leonard sa unang 27 games dahil sa right quadriceps tendinopathy, isang kondisyon kung saan sumasakit at humihina ang tuhod.

Tumapos si Leonard na may 13 points, 6 rebounds, 1 assist at 1 block bago dumiretso sa locker room sa dulo ng third quarter.

Nasa bench si Leonard sa fourth quarter nang tumapos si Barea ng isang atake ng Dallas na pinamunuan niya sa iniskor na 8 points sa huling 1:49 minuto sa third period.

Tumipa naman si Harrison Barnes ng 17 points, habang nag-ambag sina Yogi Ferrell at Wesley Mathews ng tig-16 markers para tapusin ng Mave-ricks ang kanilang five-game losing slump sa kanilang tahanan at laban sa Spurs.

Ang kabiguan ang pumigil sa four-game winning streak ng San Antonio.

Nagtala din si Barea ng 6 assists para sa Dallas at nakipagtambal kay alley-oop dunk partner Dwight Powell, naglista ng 12 points at 12 rebounds.

Kumolekta si LaMarcus Aldridge ng 23 points at 13 rebounds kasunod ang 21 markers ni Rudy Gay para sa Spurs.

Higit naman sa 20 minuto ang binigay na playing time ng San Antonio kay guard Tony Parker, nagbalik mula sa surgery para sa isang ruptured quadriceps tendon.

Sa Minnesota, inagaw naman ng Philadelphia 76ers ang isang 118-112 overtime victory laban sa Timberwolves.

Nagsalpak si Joel Embiid ng dalawang free throws sa huling 14 segundo sa regulation na nagdala sa 76ers sa extra period.