Guiao, Buenafe magkakasama uli?

MANILA, Philippines — Matapos ang limang taon ay inaasahang mu-ling magsasama sa iisang koponan sina Guiao at Buenafe.

Inalok ng NLEX, pinamamahalaan ni Guiao, ng kontrata si Buenafe para sa kanyang pagbabalik sa PBA matapos hirangin bilang Most Valuable Player sa Marikina City Basketball League sa kanyang paglalaro para sa Hobe Bihon-Macway.

“If he won’t accept his offer, he’s free to explore,” sabi ni Guiao sa 34-anyos na dating kamador ng Emilio Aguinaldo College Generals. “But the chances of him cracking the roster is big. It’s up to him.”

Noong 2012 PBA Commissioner’s Cup ay inihatid ni head coach Yeng ang Rain or Shine sa kampeonato kung saan isa ang shooting guard na si Buenafe ang sinandigan niya.

Kinumpirma din ni NLEX team executive Ronald Dulatre ang kanilang alok sa No. 11 overall pick ng Coca-Cola Tigers noong 2007 PBA Rookie Draft.

“We’ve already made an offer of one year to him,” wika ni Dulatre kay Buenafe.

Ang Hobe Bihon-Macway ni team owner Bobby Co ang naging ‘breeding ground’  para sa mga players na gustong makapaglaro sa PBA kasama ang mga ex-pros na hangad makabalik sa pro league.

“We’re happy Ronjay became part of our organization. We’re happy to see him making his way back to the PBA thru Hobe Bihon-Macway,” wika ni Co.

Nakatakdang magbukas ang 43rd season ng PBA sa Disyembre 17 kung saan haharapin ng nagdedepensang San Miguel ang Phoenix sa pagsisimula ng 2018 PBA Philippine Cup sa Smart Araneta Coliseum.