Humataw uli si Lebron
Tumira si LeBron James ng Cleveland sa pagitan nina JJ Redick at Ben Simmons ng Philadelphia.
CLEVELAND -- Ipinoste ni LeBron James ang kanyang pangatlong triple double ngayong season at pang-58 sa kanyang career para tulungan ang Cavaliers sa 105-98 paggupo sa Philadelphia 76ers.
Tumapos si James na may 30 points, 13 rebounds at 13 assists sa loob ng 39 minutong paglalaro para ibangon ang Cleveland mula sa naunang kabiguan sa Indiana noong Biyernes na tumapos sa kanilang 13-game winning streak.
Halos alas-4 na ng hapon dumating ang Cavaliers sa Cleveland matapos maantala ang kanilang flight mula sa Indianapolis.
Kinuha ng 76ers ang 18-7 abante sa first period bago inagaw ng Cavaliers ang kalamangan at itayo ang double-figure sa second at third quarter bago muling naisuko ang naturang kalamangan.
“This is a big win for us,” sabi ni James. “After everything that we went through last night, your whole day is kind of just screwed up.
For us to come out here and be professionals — nobody’s going to feel sorry for you — everyone just gave what they had and we were very resilient, have a lot of resolve.”
Nagdagdag sina Jeff Green, Kyle Korver at Dwyane Wade ng tig-13 points mula sa bench, habang may 12 markers si Jae Crowder para sa Cleveland.
Ang three-pointer ni James sa huling 40 segundo ang nagbigay sa Cavaliers ng 104-98 abante sa 76ers.
Umiskor sina J.J. Redick at Robert Co-vington ng tig-19 points para pamunuan ang Philadelphia.
Sa Charlotte, humugot si Fil-American guard Jordan Clarkson ng 14 sa kanyang 22 points sa fourth quarter para akayin ang Los Angeles Lakers sa 110-99 panalo laban sa Hornets.
Nagdagdag si Brandon Ingram ng 18 points kasunod ang 15 markers ni Kentavious Caldwell-Pope para sa Lakers, sumasakay sa two-game winning run matapos mahulog sa limang sunod na kamalasan.
Sa sobrang init ni Clarkson na ibinabad siya ni coach Luke Walton sa kabuuan ng fourth quarter habang iniupo naman si rookie sensation Lonzo Ball sa bench. Tumapos si Ball na may 5 points at 9 assists matapos maglista ng 10 points, 8 rebounds, 8 assists, 3 steals at 4 blocks sa nakaraang 107-104 panalo ng Lakers laban sa Philadelphia 76ers.
- Latest
