PBAPC Annual Awards gagawin sa Nobyembre 30
MANILA, Philippines — Pararangalan ng Philippine Basketball Association Press Corps (PBAPC) ang mga players at personalities na nagpakitang-gilas sa nakaraang season sa pagdaraos ng 24th staging ng Annual Awards sa Nobyembre 30 sa Gloria Maris Restaurant sa Gateway Mall sa Cubao.
Itatampok sa formal gathering ang presentasyon ng Virgilio ‘Baby’ Dalupan Coach of the Year trophy na ipinangalan sa namayapang PBA mentor na ikinukunsiderang pinakamahusay na coach sa bansa.
Bukod sa nasabing Coach of the Year honor ay ibibigay din ang Danny Floro Executive of the Year award na tribute sa dating team owner ng Crispa Redmanizers.
Sapul noong1993, ang pagkilala ay ibinibigay taun-taon ng PBAPC, binubuo ng mga reporters ng mga daily broadsheets, tabloids at websites na regular na nagkokober ng PBA beat.
Ang awards ay iba sa regular na ipinamamahagi ng pro league sa pagtatapos ng bawat season.
Kikilalanin din sa event na inihahandog ng Cignal ang Defensive Player of the Year, Mr. Quality Minutes, and The ‘Bogs Adornado’ Comeback Player of the Year bilang alay sa dating three-time MVP at Hall of Famer.
Ang iba pang parangal ay ang All-Rookie team, Scoring champion, Order of Merit – ibinibigay sa may pinakamaraming Player of the Week honor ng PBAPC – at ang All-Interview team.
Sa unang pagkakataon ay ibibigay ng grupo ang ‘Game of the Season,’ igagawad sa mga koponang may hindi malilimutang laro.
Ang official PBAPC Facebook page ay ilulunsad din sa nasabing event.
- Latest
