F2 Cargo Movers itataya ang liderato kontra sa Cignal
MANILA, Philippines — Muling itataya ng nangungunang F2 Logistics ang malinis nilang marka sa pagsagupa sa Cignal sa pagpapatuloy ng Chooks to Go-Philippine Superliga (PSL) Grand Prix sa Filoil Flying V Centre sa San Juan City.
Ngayong alas-7 ng gabi ang salpukan ng Cargo Movers at HD Spikers matapos ang unang laban sa pagitan ng Generika-Ayala Lifesavers at Victoria Sports-UST Tigresses sa alas-4:15 ng hapon.
Ang F2 Logistics ang pinakamainit na koponan sa kasalukuyan matapos magtala ng limang sunod na panalo.
Kabilang sa mga koponang ginapi ng Cargo Movers ay ang Petron, Sta. Lucia, Cocolife, Generika-Ayala at Victoria Sports-UST.
Dahil dito ay marami ang naniniwalang kaya nilang mawalis ang elimination round.
Ngunit para kay head coach Ramil de Jesus, mahaba pa ang kanilang laban.
“It’s still a long way to go,” ani De Jesus.
“While sweeping the eliminations is our main goal, we know that we still have a lot of things to work on and improve. This is a tough league. You really have to work hard if you want to win,” dagdag pa nito.
Ayon pa kay De Jesus, hindi madaling kalaban ang Cignal na pinangungunahan ng malalakas na middle blockers na sina Beth Carey ng Australia at Alexis Matthews ng United States at ni Japanese libero Mami Miyashita.
Kababalik pa lamang ng HD Spikers sa winners circle matapos ang straight sets win kontra sa Iriga City noong nakaraang Linggo kung saan nag-step up sina Jovelyn Gonzaga, Paneng Mercado at Royse Tubino para tulungan sina Carey at Matthews.
“Hopefully, we can sustain our winning character,” pahayag ni Cignal head coach George Pascua.
“I always tell the team that we are a champion team. We’re being expected to play like one. So we have to work hard every game and live above those expectations,” dagdag pa nito.
Ayon pa kay Pascua, kinakailangan nilang pigilan sina Aby Maraño at Majoy Baron sa gitna gayundin ang malalakas na atake nina imports Kennedy Bryan at Maria Jose Perez.
“We need to take away their middle game and attacks through effective blocking and floor defense. F2 is a very good team. You have to be at your best defensively for you to win,” ani Pascua.
- Latest