Antonio runner-up sa World Seniors

MANILA, Philippines — Pinayukod ni Filipino Grand Master Joey Antonio si Italian International Master Spartaco Sarno sa 51 moves ng Caro-kann Defense para tumapos sa ikalawang puwesto sa 50-and-above division ng 27th World Seniors Chess Championship sa Acqui Terme, Italy noong Sabado ng gabi.

Nakatabla ng 55-anyos na si Antonio sa No. 2 si French GM Eric Prie na nakipag-draw kay Russian IM Evgenij Kalegin, sa magkatulad nilang 8.5 points ngunit nakaungos ang Pinoy GM sa tiebreaks, 73-71.5.

Ito ang pinakamagandang pagtatapos ng isang Filipino player sa nasabing annual tournament.

Nakipaghati naman sa puntos si GM Julio Granda Zuniga ng Peru kay 2016 GM Giorgi Bagaturov ng Georgia para angkinin ang korona  sa kanyang 9.5 points.

Samantala, pumangatlo si Antonio sa blitz section nang magtala ng 7.0  points.

Si Ukrainian IM Alexander Reprintsev ang naghari sa naturang side event sa kanyang nalikom na 8.5 points kasunod si German Rolf Fritsch (7.5 points).

Nakipaglaban naman si Filipino GM Eugene Torre kay GM Anatoly Vaisser, ang 2016 title-holder at four-time winner ng nasabing torneo, sa 57-move standoff ng Queen’s Pawn showdown.

Nagtala si Torre ng 8.0 points kasama ang apat pang players.

Nagtapos si Torre sa seventh place matapos ang tiebreaks sa likod nina Vaisser, GM Vlastimil Jansa ng Czech Republic, GM Vladimir Okhotnik ng France, GM Lothar Vogt ng Germany at GM Yuri Blashov ng Russia.

Si Russian GM Evgeny Sveshnikov ang kumuha sa titulo matapos talunin si IM Arkady Shevelev ng Israel mula sa kanyang 8.5 points.