La Salle sa Finals

MANILA, Philippines — Tumikada ng pamatay na 14-0 atake ang nag­dedepensang De La Salle sa simula ng fourth quarter upang agawin ang bentahe patu­ngo sa 82-75 paggiba sa Adam­son para pormal na makatuntong ng Finals ng UAAP Season  80 men’s basketball tournament kahapon sa Smart Araneta Coliseum. 

Naiiwan sa 54-63 sa pagtatapos ng third period, ipinakita ng Green Archers ang kanilang ti­bay nang agawin ang 68-63 bentahe matapos ang ibinagsak na 14-0 bomba sa 5:55 minuto sa final canto.

Mula doon ay dalawang beses pang dumikit ang Falcons, ang pinakahuli ay sa 70-71 matapos ang 3-pointer ni Robbie Manalang sa 3:22 minuto ng laban.

Ngunit hindi natinag ang La Salle at isinara ang laro sa pamamagitan ng 11-5 ratsada upang si­guruhin ang tagumpay pa­ra sa ikalawang sunod na taong pagpasok nila ng UAAP Finals.

Nagtala ng 27 points si import Ben Mbala, habang nagdagdag ng 15 at 14 puntos sina San­ty Santillan at Richie Ri­vero, ayon sa pagkaka­sunod, pa­ra pangunahan ang na­sabing ‘come-from-behind’ win.

Nanguna naman sa Adamson, kinuha ang 54-39 abante sa kalagitna­an ng third quarter dahil sa mainit na perimeter shooting si Jerick Ahan­misi na may 17 points ka­sunod si Manalang na may 16 markers.

Samantala, tatangkain namang sungkitin ng Ateneo ang ikalawang Finals berth sa pagsalang kontra season sa host Far Eastern University nga­yong alas-4 ng hapon sa Big Dome.

Bagama’t nabigo sa huling laban nila kontra sa La Salle sa pagtatapos ng eliminations, tumapos pa ring No. 1 ang Blue Eagles na gaya ng Green Archers ay may taglay na ‘twice-to-beat’ bonus kontra sa fourth seed na Tamaraws.

Puntirya ng Ateneo na kumpletuhin ang ka­nilang domi­nas­yon laban sa FEU nga­yong season. FMLumba