Mainit na pagbabalik ni Al Horford

BOSTON – Nagbalik sa hardcourt si Al Horford mula sa isang two-game absence at umiskor ng 21 points buhat sa 8-of-9 fielgoal shooting para tulungan ang Celtics na gibain ang Toronto Raptors, 95-94.

Ito ang pang-12 sunod na arangkada ng Boston.

“He’s playing young again,” sabi ni teammate Terry Rozier kay Horford.

Nauna nang humakot si Horford ng 15 points, 10 rebounds at 9 assists laban sa dati niyang tropang Atlanta Hawks noong Lunes kung saan siya nasiko sa ulo ni Kent Bazemore na nagdala sa kanya sa NBA concussion protocol.

Hindi rin nakalaro si Horford sa siyam na laban ng Celtics noong nakaraang season dahil sa isang concussion.

“I don’t know if young Al Horford played like this, to be honest,” sabi ng dating four-time All-Star. “You know, it’s been years of just working on my game and try to play this new way.”

Naglaro ang Boston (12-2) na wala si Kyrie Irving na nasiko sa mukha ng kanyang teammate na si Aron Baynes noong Biyernes sa panalo nila laban sa Charlotte Hornets.

Nagdagdag si Jaylen Brown ng 18 points, habang may 16 markers si Rozier bilang kapalit ni Irving.

Pinangunahan ni DeMar DeRozan ang Raptors mula sa kanyang 24 points, samantalang nag-lista si Kyle Lowry ng 19 points at 7 assists.

“They are the best team in the NBA right now, 12 in a row,” ani Lowry sa Celtics. “They’re playing unbelievable, everyone is picking up slack.”

Ang acrobatic lay-up ni Jayson Tatum sa huling 1:26 minuto ng fourth quarter ang nagbigay sa Boston ng 95-90 abante kasunod ang mintis na stepback jumper ni DeRozan sa panig ng Toronto sa nalalabing 19 segundo.