Lozada at Laurente may tig-3 golds na

Dumaguete City  , Philippines  —  Nakasungkit pa ng tig-isang gintong medalya sina Michael Gabriel Lozada ng Aklan at Chloe Sophia Laurente ng Ormoc sa swimming kahapon para maging triple gold medalists sa pagpapatuloy ng 2017 Batang Pinoy Visayas Leg sa Gov. Lorenzo Teves Memorial Aquatic Center dito.

Magaang nakuha ng 10-anyos na si Lozada ang ginto sa boys 12-year and under 200-m backstroke sa oras na 2:48.34 habang ang pumapangalawang si Marco Juan Sayson ay nagtala lamang ng 3:06.51 at 3:07.35 naman sa third finisher na si Rafael Uy ng Bacolod.

Sa ikalawang araw pa lamang ng medal-rich swimming competition, tatlo na agad ang panalo ni Lozada kabilang na ang dalawa (200-m individual medley at 50-m backstroke) noong Sabado.

May panghihinayang sa 10-anyos na si Lozada matapos ma-disqualify sa boys 400-m individual medley dahil isang kamay lamang ang lumapat sa touch pad pagkatapos sa breaststroke tungo sa freestyle ng event na hindi ayon sa patakaran ng kompetisyon.

“Umiiyak si Michael ng sinabi namin sa kanya that he was disqualified in the 400-m IM. It was really painful  for him because it’s his first time to be disqualified in a competition and it was supposed to be a gold,” sabi ng ama ni Michael na si Cris Lozada.

Ang nasabing pangyayari ay nakaapekto sa Grade VI estudyante ng Infant Jesus Academy ng Aklan kaya tumapos lamang  ito sa pang-limang puwesto sa 100-m butterfly bago nakarekober sa 200-m backstroke.

“He (Lozada)  touched the pad only with one hand, which is a violation to the rules. We have to be fair to all. A rule is a rule,” ayon naman kay tournament director Richard Luna na isang international swimming federation certified technical official.

 Nagwagi rin si Laurente sa girls 12-year and under 100-m butterfly (1:16.71) para sa ikatlong ginto kasama na ang dalawa sa unang araw (200-m individual medley at 50-m backstroke).

Pagkatapos ng dalawang araw, nangunguna pa rin ang Aklan sa swimming sa kanilang 8 golds, two silvers at limang bronzes kasunod ang Bohol (3-4-2) at Cebu Province (3-5-5) habang ang Ormoc ay 3-3-2 at 2-0-1 ang Leyte at 1-3-3 ang Cebu City.