Wish ni Roach kay Pacquiao

MANILA, Philippines — Walang ibang gusto si chief trainer Freddie Roach na gawin si Manny Pacquiao kundi ang magretiro bilang isang world boxing champion.

Kaya naman umaasa si Roach na lalabanan ni Pacquiao si Australian world welterweight titlist Jeff Horn sa rematch sa susunod na taon kasunod ang tulu-yan nang pagsasabit ng kanyang boxing gloves.

“I could not conceive seeing Pacquiao in a secondary position, other than as a world champion,” sabi ni Roach sa panayam ng kahapon ng ESPN Deportes.

Binugbog ni Horn  (17-0-1, 11 KOs) si Pacquiao (59-7-2, 38 KOs) via unanimous decision para agawin sa Filipino world eight-division champion ang hawak nitong World Boxing Organization welterweight crown sa Suncorp Stadium sa Brisbane, Australia noong Hulyo 4.

May rematch clause sa kanilang fight contract na tinanggihan ni Pacquiao dahil tanging sa Australia lamang niya maaaring hamunin si Horn.

“I hope that he goes forward with that fight and that after it, he retires from boxing,” wika ni Roach.

Sinabi pa ng Hall of Fame trainer na sadyang hindi kayang pagsabayin ni Pacquiao, ipagdiriwang ang kanyang pang-39 kaarawan sa Disyembre 17, ang kanyang trabaho sa Senado at ang pagsasanay para sa isang boxing fight.

“It is a fight that is supposed to take place next year, and the date could not be set due to Manny’s work, regarding his duties within politics in his position as Senator,” wika ni Roach.

Sakaling labanan ni Pacquiao si Horn sa rematch kasunod ang pagsasabit ng kanyang boxing gloves ay maaari nang tutukan ng Filipino boxing icon ang kanyang political career.