11-sunod ang Boston

BOSTON -- Nanati-ling mainit ang Celtics sa NBA, samantalang igniya naman ni Paul George ang Oklahoma City Thunder sa panalo laban sa Los Angeles Clippers.

Dumiretso ang Boston sa kanilang ika-11 sunod na panalo matapos tangayin ang 90-87 tagumpay kontra sa Charlotte Hornets.

Ginawa ito ng Celtics bagama’t nawala sa laro si Kyrie Irving sa first period matapos masiko sa mukha.

Tumipa sina Jayson Tatum at Shane Larkin ng tig-16 para tulungan ang Celtics na makabangon mula sa 12-point, fourth-quarter deficit para resbakan ang Hornets.

Nagtala si Terry Rozier ng 15 points, 7 rebounds at 4 assists para saluhin ang naiwang trabaho ni Irving.

Sa Oklahoma City, kumamada si George ng 42 points, 9 rebounds at 7 assists para akayin ang Thunder sa 120-111 panalo laban sa Clippers.

Nagsalpak si George ng 13 of 22 fieldgoal shooting kasama ang 4-of-7 clip sa three-point range para sa panalo ng Oklahoma City.

Nag-ambag si reigning MVP Russell Westbrook ng 22 points, 8 assists at 3 steals para sa Thunder.

Winakasan ng Oklahoma City ang kanilang four-game losing slump.

Binanderahan naman ni Lou Williams ang Clippers mula sa kanyang 35 points at 7 rebounds, habang may 17 markers si Blake Griffin.

Sa San Antonio, tumapos si  Giannis Antetokounmpo ng 28 points at 12 rebounds sa pagbangon ng Milwaukee mula sa four-game skid  sa pamamagitan ng 94-87 panalo sa San Antonio.