San Miguel, Kia pumasok sa trades
MANILA, Philippines — Kung may ‘Twin Towers’ ang Barangay Ginebra sa katauhan nina seven-foot center Greg Slaughter at 6’8 flying forward Japeth Aguilar, puwede ring gayahin ito ng San Miguel.
Ibibigay ng Beermen sina role players Jay-R Reyes, Keith Agovida at rookie Rashawn McCarthy, isang future first rounder at cash considerations sa Kia Picanto para makuha ang hawak nitong No. 1 overall pick sa darating na 2017 PBA Rookie Draft na nakatakda sa Oktubre 29 sa Robinson’s Place sa Ermita, Manila.
Naisumite na ang trade papers ng Kia at San Miguel sa lamesa ni PBA Commissioner Chito Narvasa.
Malalaman ang magiging desisyon ni Narvasa kung aaprubahan ang naturang trade bukas.
Intensyon ng Picanto na hugutin si 6-foot-7 Fil-German Christian Standhardinger, miyembro ng Gilas Pilipinas. bilang top overall pick.
Gagamitin naman ng Beermen ang 29-anyos na si Standhardinger bilang katambal ni 6’10 at four-time PBA Most Valuable Player June Mar Fajardo sa shaded lane.
Isinara ng Kia ang kanilang season hawak ang 6-27 record kasama ang 0-11 record sa kasalukuyang 2017 Governors Cup.
Ito ang ikalawang pagkakataon sa loob ng tatlong taon na ipamimigay ng Picanto ang kanilang first round draft pick.
- Latest
