May tsansa kay Delarmino

ASHGABAT, Turkmenistan – May pagkakataon si Pinoy Muay Thai fighter Phillip Delarmino na makapag-ambag ng gintong medalya para sa Team Philippines.

Ito ay matapos umiskor si Delarmino ng 30-27 panalo laban kay Rusdem Bayramdurdyyew ng Turkmenistan sa kanilang -57kg semifinals match sa 5th Asian Indoor and Martial Arts Games (AIMAG) dito sa Ashgabat, Turkmenistan.

Lalabanan ng tubong Iloilo City para sa gold medal si Chotichanin Kokkrachai ng Thailand na umiskor ng 30-27 panalo kay Almaz Sarsembekov ng Kazakhstan.

“Nakita na namin mga laban niya (Kokkrachai), meron kaming gameplan  para sa kanya. Kaya naman. Sana makuha natin ‘yung gold sa finals,” ani Delarmino, nakapasok sa quarterfinals sa nakaraang Muay World Games sa Poland noong Agosto.

Ang Team Philippines ay nasa No. 13 sa medal count na 2 gold, 5 silver at 6 bronze medals.

Pinaulanan ni Delarmino, silver medalist sa Asian Beach Games noong 2014 at second placer noong 2013 Southeast Asian Games sa Myanmar, ng mga suntok at sipa ang Turkman patungo sa kanyang panalo.

“Nahirapan din ako sa kalaban ko, pero effective naman yung game plan namin ni coach (Billy Alumno),” sabi ng 26-anyos na si Delarmino. “Napag-aralan namin dahil sa last two fights ko ganun lang plano ko. Clear na kunin namin every round. Mahirap kasi kung dumikit ang laban tapos ang kalaban host country pa.”

Samantala, nagbigay naman sa bronze medal sina taekwondo jin Francis Aaron Agojo, yumukod kay Jang Jun ng South Korea (34-9) sa -58kg semifinals, at wrestler Jefferson Manatad, natalo kay Kazakhstan bet Aldos Kulmanbetov (5-0) sa -80kg Classic Style final four.

Nakuntento din sa tansong medalya si Kurash grappler Al Rolan Llamas nang matalo sa semifinals kontra kay Erkin Omurzakow ng Turkmenistan, 10-0, sa men’s -60kg weight class.

Hindi naman umabante sa medal round sina na wrestlers Noemi Tener (women’s classic style -60kg), Grace Loberanes (-50kg), Michael Vijay Cater (men’s classic style -55kg), Christof Hofmann Jr. (-90kg) at Jonathan Maquilan (-65kg).

Pumang-lima si Dessa Delos Santos sa women’s weightlifting mula sa kanyang combined lift na 184kg sa women’s 58kg division.

Si Luo Xiaomin of China (222kg) ang kumuha sa gold medal kasunod sina second-placer Muattar Nabieva ng Uzbekistan (212kg) at bronze performer Acchedya Jagaddhita ng Indonesia (204kg).